De Smeetsgroep - een limburgse familiesite
DRIEVOUDIG IN MEMORIAM. Op dezelfdje daag - 8 november 1987 - gestorve: Harie Terporten, 94 joar; René Smeets, 90 jaor; Nol Janssen, 77 jaor.
HARIE de koperslager, vanaaf 1907 lid van de Harmonie St. Cecilia).  Harie, bie mich thoês is de pômp kapot, kins doe effe komme; leefst ei bietje vlot? Wils doe der estebleef aan dinke, ich kan de kuuj neet laote drinke. Harie, steeds drôk, geien tiëd om te aete, Mer zao get moogdje hae echt neet vergaete. Hae es pômpemaeker waas toch de man, dae begreep det eine boer neet zonger water kan! Harie, betroewbaar vakman, jao opperbest, want euveral woo doos môs waere gelést, dreef hae buuze de grondi in, al jônk mer auch later. Hae pômpdje, preufdje en sprook: 'Detis good water!'.
RENE de smeed (vanaaf 1912 lid van de fanfare Eensgezindheid). René môs 'smorges vreug soms väöl doon aan de boerewerkpaerd mit versjleete sjoon Det waerdje den good geregeldj mit de boere; hae begôs den zonne daag al veur zeeve oere. René zien aambeeldj deej KLING KLANG al vreug euver de ontwakendje Baek, 't deej eederein deug, gehamer oët de smidse eine bekindje klank, tegelièk mit de brandj van de paers-hoove-stank! René keek ins nao boëte toet aan de straot. Dao stông ein riej paersboere om raod en daod; jao, auch meenige kranke paerdevoot maakdje de smeed mit zien vakkunst weer good!
NOL de slechter (vanaaf 1954 lid van de Harmonie St. Cecilia). Nol wist, es het Paose of Kérmis ging waere en de miense get extra wolle vertaere, hae veur hiêl väöl luuj oet Bracht mos zorge det vérke of koe waas geslacht. Nol waas eine vakman, jao op en top! Terecht waas hae auch greûts dao op. Hae sprook: "t is zo geleege, hier steet een levendge koe; maakde gij eens panklaar vlees, als gij niet weet hoe?' Nol waas neet allein es gooie vakman bekindj Hae waas vroolik van aard en bie eederein bemindj. Wen hae zich bedeendje van zien spreuke in ale toane vonj hae in zie bewaoge laeve toch altied weer het sjoane! Alle drie same 261 jaor aod. Es drie dierbaar miense op dezelfdje daag vân ôs gaon, den is het good dao aeve bie stil te staon. Bie zonne laeftied mooge weer neet väöl traeone gaeve zeker bie driemaol ein zao veurbeeldig laeve. Mer waat os ziër trof; waorom alle drie gelik geur opgeroope nao het Heemelse riëk? Dao kônne weer zeker allein mér nao gisse, al bleeve weer neet gans in het ôngewisse,.. Op 't Kerkhaof dao fluusterdje men tôsse muzikante-geweemel, dao is beslistj get te doon van muziëk in den Heemel door Jac Linssen 

top