requiem pierre

De Smeetsgroep - een limburgse familiesite

Afscheidsdienst van Dhr. Pierre Smeets “Pierre vanne Smeed” 1 november 2014

1 Muziek…Blowing in the wind…James Last Welkomstwoord door Marian Noeit vroagend, noeit klagend Zien pien in stilte steeds dragend Zien henj hubbe veur os gewerrekt Zien hert heet veur os geklopt Zien uig hubbe os tot ut letst gezocht Dit gedicht herkend ge wellicht waal allemoal. Ut is ut gedich det de kinjer gans boavenaan, naeve de foto vaan hun vader, oppe rouwbreef en in de krante advertentie hubbe loate zette. Un gedicht mit zurrig oetgezoch, un gedich auch det al hiel veul zaet. Beste minse, moog ich uch welkom heite, hiej in de aula vaan ut crematorium. Heej op dees plaats goan we ut laeve vaan Pierre Smeets of te waal Pierre vanne Smeed herdenken en we goan hem de laatste eer bewieze. In ut biezonder wil ich ein woord vaan welkom richten aan de kinjer en de kleinkinjer mar natuurlijk auch aan de euverige femilieleeje, vrunj, verengingsminse, buren en bekende. Pierre waas eine minse - mins. He waas gaer onger de luuij. Eine verenigingsman en vasteloavesman in hert en niere. En det zuus se hiej auch truuk. Allemoal minse die veur hem gekomme zeen. Pierre heat in zien lange laeve meerdere kieren in ut middelpunt vanne belangstelling gestoan…gewild, denk mar ins an zien Prins zien, maar…messjien auch waal ins ongewild. Vanaag steit he veur de letste kier in ut middelpunt vanne belangstelling en ich durf te zegge…ungewild. As ut aan hem zellef gelage had daan waas he nog gaer get langer hie gebleve. Mits…in gooije gezondheid netuurlik. Helaas waas det de letste tied neet mier. Noe heat dr vrede mit ziene doed en zien femilie kan zich doa in vinje. Ze zeen bliej det papa, opa nog mier lijd bespaard is gebleve, Vandaag motte we heej dan auch aafschied vaan Pierre nimme. Daat goan we doan op ein meneer die biej hem pest. Neet mit allemoal poes pas, um ut zoe mar ins te zegge, want doa heel he absoluut neet vaan. He heel vaan gewuun, degelik, praktisch en vaan hummor. Noe goan we heej echt neet de pollonaise danse, maar we goan dees deenst waal invulle in de geest vaan Pierre. Waardig, respecvol en zeker ein bietje luchtig. Veurdat we verder goan mit dees deents zal ich mich efkes veurstelle. Miene naam is Marian Sniekers-van Ooijen en René, Nicole en Juliette hubbe mich gevroag of ich as woorddienstbegeleidster dees deenst wooj verzurrige. Aafgeloupe woensdag hubbe we daan auch ein mooi gesprek gehad bie René an de groete tafel in de Gasterie. Tiedens dat gesprek hub ich gevroag of de kleinkinjer vanmiddag missjien gaer ein kerske aan woeije komme make veur opa en…dat wilde Ivo en Laura waal. Mit diej kerskes, die vlemkes eigelik, diej licht en werremte oetstroale, bedanke ze opa nog eine kier veur alles waat he veur heur gedoan heet. Tevens zien dat kerskes die aangestoake were veur oma. Oma Smeets diej 2 ½ joar geleeije overlede is. Ivo en Laura kom mar ins nor veure. Ondertusse daat de kerskes aangemakt were zaulle we ein momentje stil zien um de minse de kans te gaeve, asse daat wille, nog efkes veur Pierre te bidde of um nor sjoen herinneringe mit hem te gaoan. 2 Muziek…Moonlight Serenade…Glenn Miller Levensverhaal door Marian Ut weegske vaan Pierre heet gestoan aan de Kerkstroat in Brachtbeek. 89 joar geleeije op 1 februari 1925 geboare as ierste zoon in un gezin mit 6 kinjer. Helaas is dr al ein zuske vaan Pierre op jonge laeftied euverlede. In d’n oerlog hoefde de familie Smeets, as ein vaan de weinige gezinnen in Brachtbaek, neet te evacueren en dit hadde ze te danke aan de smederiej an hoes. De Duitsers koosse waal ein paar ervare smede gebroeke en dat is dan auch hun geluk gewaes. De hiel femilie is ongeschonden oet de oerlog gekomme mar sjienbaar heat diej periode waal depe indruk gemaakt op de toen 15-20 joarige Pierre. Zien hiele laeve lang is he toch waal ein bietje geobsedeerd gebleve door de oerlog, he heet d’r ontelbare beuk en verhoale euver gelaeze en auch heat dr erg veul oerlogsfilms en docementaires bekeke. Vakanties, oetgoan en plezeer make doa is Pierre noeits vies vaan geweas. As jonge jong lierde he, op ut hengstebal, Mien Kessels oet Kessel kinne. Pierre vroog ut sjoene maedje ten dans en…vaan ut ein kwoam ut anger. Noa ein dansje volgde un proatje en noa dat proatje un afspraakje. Ut vlemke sloog euver en Pierre en Mien zeen in 1955 getrouwd… mit Brachter kermis. Ze ginge woene oppe Molenweeg in Maasbracht en begose mit hun eige zaak. Auch were ze de trotse oajers vaan René, Nicole en Juliette. Pierre had un druk mar wal good laeve, he waas echtgenoot, vader, undernummer, had doaneave veul hobby’s, waas eine echte verenigingsman, en had gein zit-vot want he waas altied bezig. He heat altied hel gewerrekt veur zien gezin, zien zaak en veur de vereniginge. Pierre vanne Smeed waas eine sociale miens. En sociale minse, die doabiej auch waal van ein gleaske beer haaije, weare gevroagd um Prins te waere. En zoe gebeurde ut dat Pierre in 1963 oetgeroape weer tot Prins vaan de Hoonder. Toen ich vaan de waek mit de kinjer um de tafel zoat vertelde ze mich doa ein sjoen annekdote euver. Toen pap, nog onherkenbaar en ein bietje zenuwechtig, oppe bühn stong net veurdat he oetgeroape weer, reep vanoet de zaal emes… ”ich weit al waem Prins weurdj; Pierre vanne Smeed, want dae kint neet stil blieve stoan en stuitj altied te demmele”. Inderdaad…ut woordje ‘stilstoan’ steit neet in ut woordebook vaan Pierre. He wooij veuroet. Waas ambitieus en had organisatietalent. Auch reizen, op vakantie goan en toere is dr zien hiele laeve, toetdat ut neet mier ging, blieve doon. Mit zien vrouw, mit zien kinjer en auch mit vrunj. Dat Pierre avonturiersblood door de aderen had stroumen bewiest waal ut feit dat he mit ziene Harley Davidson motor, oet 1946 same mit ziene motorvrundj Jan Wertz zaliger, oet Grathem, in 1979 nor ut toenmalige Joegoslavië is gereeje. He vonj ut geweldig allemoal maar ut ging auch uns mis. In zo’n Oostblokland ware de weeg erreg ongeliek. 999 koele were vermede mar biej de doezendste koel doa veel Pierre. He zoat under ut zand, kleier kepot, maar wat erger waas he had auch nog versjillende wonde diej behuurlik blooijde. Op nor un zekenhoes dus. Of ut woar is weite we neet mar Pierre heet altied gezag dat ze hem doa mit ein stompe noald gehecht hubbe. Maar goed…’noa die marteling’…mos dr toch nog ein hotelletje gezoch were um te euvernachte. Op versjuillende plaatse weer hem vriendelijk maar resoluut medegedeeld dat ze helaas al vol zoate. He snapte dr niks vaan. Oeteindelik had dr dan toch in Duitsland un hotel gevonje. Toen dr in ut spegel keek zoag he auch woarum ze hem euveraal geweigerd hadde. He zoag d roet wie eine zwerver. Kapotte, vettige kleier en auch nog ins hielemoal onger ut blood. Toen dr efkes later fris gedoucht nor de receptie vaan dat hotel ging hadde ze hem neet mier gekoos. Sjoene verhoale, dalik zult ge dr vaan Rene nog veul mier huure. Ich wil ut nog gaer efkes hebbe euver de titels die Pierre vanne Smeed allemoal heat. - President – Vorst – Prins - Ex Prins, (mit de klemtoon op EX ,want ut woordje ‘Aod’ wooij he dr neet veur hubbe stoan. Maar… auch had Pierre dn titel vaan Opa. In 1996, toen ziene ierste kleinzoon Daniël geboare weer is dr veur de ierste kier Opa gewoare. In 2000 moogde he det nog eine kier mitmake want toen weer ziene twiede kleinzoon en tevens stamhooijer Ivo geboare. Ivo waas volges opa een aafkorting vaan…’Is Vaan Oos’. 3 Joar later weer dr nog ein maedje geboare…zien kleindochter Laura. En waat waas Opa gruuts. Toen de kleinkinjer nog hiel klein en tier ware heel dr ein bietje aafstand want stel dich veur,dr zuuj is get aankomme. Later toen ze groeter were is det veranderd. Daniël is zellefs half opgegruuijd biej opa en oma moge we waal zegge. Pierre heet altied ein gooj gezonheid gehad maar noadet he ein paar kier getroffe waas door ein TIA begoos ut fysiek toch allemoal get minder te weare. Vief joar geleeije waas ein verhoezing daan auch waal noodzakelik. Pierre en Mien verhoesde nor Sint Odilienberg en…he waas doa gaer. Doa in Zorgcentrum Bergh heet Pierre as 85 plusser nog o.a. rummikuppen gelierd. En dat is toch waal hiel biezunjer te neume omdet Pappa vreuger noeits spellekes gespeeld had. Waat auch waal hiel biezunjer te neume waas dat is dat hun vader zien lot, vaan ut steeds afhankelijker were, zoe good geacepteerd had. Zien hiele laeve is Pierre eine man gewes deen alles, mar dan auch alles, zellef wilde doon. Eine hiele zelfstandige mins deen noe eigelik bieno niks mier koos. Ungeluiflik en bewonderenswaardig hoe he in zien lot is kunne beruste. Mit name det laatste half joar heet Pierre lichamelik hiel veul in motte levere. Mentaal waas he nog bezunjer kwiek, he wis precies hoe en wat. He heet nog tege Juliette gezag det he ein fijn laeve heet gehad. Oeteindelik is Pierre moandigaovend 27 oktober ingesjloape. Zien lichaam waas op. Pierre zellef had dr vrede mit en de kinjer zien bliej dat pappa verder lijd bespaard is gebleve. Maar toch, veuraal de kinjer en kleinkinjer goan papa en opa, mit al zien positieve mar auch waal ein paar negatieve kantjes, absoluut misse. Deze eerlijke, recht veur de raap ziende, ieverige, eigewieze man, de organisator, de man auch deen aaf en toe is flink hel mit God koos kalle (en ge wet waat heej mit bedoeld wurtj)…….Deze trotse en zurrigzame man is neet mier onger us en zal gemist goan were. Un ding det zeker is. Maar troost uch mit de gedachte daat he ein good en riek laeve heet gehad. En det ge as kinjer en kleinkinjer hiel zeker get DNA van hem in uch hebt zitte. Dus eigelik zal dr noeits hielemoal weg zeen. Un sjoen gedachte… Maar dalik mot ge waal aafschied goan numme en doa wens ich uch noe al allemoal hiel veul sterkte bie…want…aafschied numme is moeilik….of zoeas Roger Wittaker zingt…Abschied ist ein scharfes schwert. 3 Muziek…Roger Wittaker…Abschied ist ein scharfes schwert Persoonlijk woord van René Hojje papa. Citaat; aod wáére is sjoën, mer aod zéén, det is minder. Mama haet ôs verrassendj sneller verlaote den w’r verwachtj haaje en toen mös d’r snel get op papier gezatj waere. Mer mit genôg inspiratie waas det toen gein probleem. Ondanks de relatief lange sleip nao ’t euverlijde van papa höb ich d’r lang euver gedaon veurdet ich de pen ter handj noom. Woo môs se beginne? D’r is zoëvaol euver papa Pierre te vertèlle, det ’t in bookvorm neet zoe misstaon. En ômdet eederein hiej aanwezig det allemaol waal witj, wis ich dus neet woo te starte. Hôngerdje annekdotes sjete mich te binne; ich zoe ’t mit sjrieve neet bie kinne haoje en dus doon ich det auch mer neet en beware w’r det zelf es gooie herinneringe, woodoor de belangriekste en veur hem meist kinmerkendje laeves-pieke de baovetoën gaon veure. Pierre vanne Smeed. Gebaore en getaoge in de aojerlikke smederie in de Brachterbaek. Later ein eige bedriefspandj geboewdj in centrum Maasbrach. In 1955 mit mama Mien op huweliksreis nao Wenen. Daonao regelmaotig door gans Europa gereisj mit motors en auto’s en det woore d’r nogal get. Ein van de hoëgtepuntje waas de veurleefdje veur ’t toenmalig fascinerendj Oostblok mit in 1967 mit de auto nao Moskou, woodoor hae eine ganse pagina inne gezèt kreeg mit es titel “Pierre Smeets is een avonturier”. Oet gaon. Auch altied vaol op stap gewaes, zoë es hiël vreuger mit alle breurs en zösters in de Citroën Traction Avant. Danse op alle kèrmisse in de buurt en Pierre kòs d’r get van, getuuge de zoëgenaamdje damesdanse, want den stông d’r noëjts aan de kantj. Sterker nog; de maedjes stônge als ’t ware in de rie ôm met hem te kinne danse. En natuurlik haet d’r auch zien kinjer ’t danse biejgebrach, wobie d’r later waal ins zag det ’t neet allein ôm ’t danse ging, mer auch ôm ’t vashaoje. Rallysport. Inkele staekwaord: Iës oriëntatieritte mit de motor, den mit de auto, ônger angere bie club Gaef Um Gaas in Vinlo wo d’r jaore lank auch in ’t bestuur haet gezaete. Later volgdje de kaartlaesritte en de echte rally’s. De DKW-tied mit naef Theo Smeets oet Ech, de Renault-tied mit nichtje Mia Smeets oet Ech, de BMW-tied mit Sjaak Smeets oet Helde (gein femilie), ’t Rally Team Limburgia mit 3 fabrieks-DAF Marathon’s, noe ruum 40 jaor geleje oetvinjer van de Limburgia Rally, nao de Rallye Monte Carlo mit de Luybregtse oet Valkeswiërd, later mit Henk Vosse oet Tegele, Man Bergsteijn oet Berg en Terbliet en auch mit mich zelf. Want waat auch hiël belangriek woor en is; hae haet zien kinjer degelik kaartlaeze en aardrijkskunde biegebrach. Bie al oos eige georganiseerdje rally’s woor d’r altied d’r biej es official, want anges ging ’t neet door (zei hae). Daorôm stuitj hie den auch de wisselbaeker van oze Coppa d’Europa. De traditie is, det es ’n evenement drie kiër op rie door dezelfdje équipe gewônne weurdj of vief kiër in totaal, det dè équipe de wisselbaeker moog haoje. Aangezeen in oos evenemente nog noëjts dezelfdje équipe gewônne haet, zuutj ’t d’r haer oet det deze baeker veur altied bie ôs blieftj. Mer es eemes deze speciale trofee verdeentj haet, is ’t waal Rally Pierre, want hae haet alle 10 de edities van dit evenement es nestor biegewoondj en mitgeholpe aan ’t slage d’r van. Pap, bie deze dit symbolische gebaar es dank veur al oos gezamelikke successe. Motorfietse en auto’s. Hiël vaol, waal 12 stöks tegeliek, mer de raum op de taart woore toch waal ziene Harley Davidson Liberator oet 1946 en de Rolls Royce oet 1958. Carnaval. Eine carnavalist in hert en neere. Mede-oprichter van carnavalsvereniging de Hoondertasters, mer van pastoër moogdje dae naam neet miër geveurdj waere en waerdje ’t de Hoonder, mer zien prinseplaat oet 1963 is dus ein historisch zeldzaam exemplaar. Vorst en president gewaes en noe al jaore iërelid en aafgelaupe jaor 5x 11. Auch haet hae jaorelank hiël gaer Pierre Cnoups begelèdj nao zien optrèjes door ’t ganse landj. Politiek. Verwoedj VVD-er en zelfs ’n tiedje in de gemèndjeraod gezète. Ontvangstcomitée Britse bevrijders. Geweldig vônj hae ’t altied es de oorlogsveterane oet Ingelandj weer kwoome en hae dao van alles mit Peter Roefs en mich veur kôs mitorganisere. De poppykrans oppe kis is den auch mede namens de Commando Association. Ongernummer. In álles, ônger angere biej de ôngernummersvereniging Maasbrach. Altied hel gewèrkdj. Goudiërlik. Rechtvaardig. Praktisch. Realistisch. Recht veur zien raap. Kôs zich soms geweldig drök make es d’r ’t örges neet mit ins woor, mer oeteindelik kwoom altied alles weer good. Nao zien pensioen in 1990 nog doorgewèrktj en de zaak langzaam aafgeboewdj, ’t pandj verkoch en eine bungalow gekoch. Zorgcentrum Bergh. Hae zag altied, det de maedjes van Bergh ‘m “Sjatje” neumdje en det die waal ins zeie det hae ’t bèste paerd van stal woor. Sinds ein jaor of vief woor papa in Bergh, iës same mit mama. Altied gaer dao gewaes. Hae veuldje zich dao veilig en thoes. Op woonsdigmiddige loestere nao live muziek en mitzinge mit leedjes van toen. En ônlangs haet zien Veterane Motorclub ‘m nog veriërdj mit ein bezeuk mit ein 20-tal aoj motorfietse tiedes ein rôndjrit en det vônj d’r geweldig. Last but not least. ’t Gezin. ALTIED alles gedaon veur gezin en kinjer; nieks waas ‘m te vaol en dao zeen w’r neet allein papa mer auch mama iëuwig dankbaar veur. Papa Pierre, eine Rolls Royce ônger de papa’s. Dank je wel veur alles. Weer allemaol höbbe van uch genaote en zeen trots op uch. W’r höbbe vaol gelache en gelökkig weinig gejanktj same. ’t Is sjoën gewaes. Doot mama en euch zusjes Zus en Truus de groete in det hemels landj hiej baove, woo’s doe nog noëts eerder woors en oëtj zeen w’r elkaar weer. W’r winse uch in gooi reis en gaon noe genete van beeldje in ôs gedachte oppe dansvloer mit de tango Olé Guapa van Malando. 4 Muziek…Malando…Olé Guapa Gedichtjes door Ivo en Laura Laura: Wanniër ich ’s-nachts nao baove kiek, zeen ich soms hiël vaol sterre; gaaf. Ze fônkele aan eine heldere hemel, hiël erg ver hie vanaaf. Es eedere miens ein ster is, dae op aarde is doëd gegaon, den kieke ze wanniër ze straole, vanoet de hemel, nao oos bestaon. En kiekendj nao al die sterre, weit ich, die van uch en oma is dao biej, geer stoandj dao aan dae hoëge hemel, en straole dao vrie en blie. Ivo: Opa, wo zeentj geer noe? Ich kan uch neet miër vinje. Geer zeentj neet in de keuke en in de hoeskamer te vinje. Zeentj geer missjien dao baove, en kiektj geer noe nao benee? Antjwaord noe op mien vraog, den bön ich pas tevree. Opa, ich weit ’t al, geer zeentj hie in mien hert. Op ein veilige plaats, en dao op bön ich hiël allert. Geer waerdje krank, leverdje in en w’r huërdje gein gezeur, geer woordj sterk en gingtj d’r veur. Geer höbtj alles gegaeve, mer w’r wiste; ins stoptj ’t laeve. Afsluiting door Marian En mit diej sjoen gedichtjes vaan de kleinkinjer zeen we noe an ut einde gekomme vaan dees deenst. Dr is veul gezag. Maar det moog auch want as emes 89 joar op deze aardbol heet rondgeloupe en boavendien veul beteikend en gedoan heet veur minse daan is dr auch veul te vertelle. 89 joar is eine gezegende laeftied. Pierre heet genote maar op ut latst ging ut allemoal neet mier. He waas kloar um ut stukske euver te gaeve. Ich eindig mit de wurtj vaan Pierre vanne Smeed zellef, de wurtj wo René straks mit begoos is… “aod wáére is sjoën, mer aod zéén, det is minder”. 5 Muziek…El Condor Pasa…James Last 6 Muziek…Ben Keampfert… Blue Spanish eyes 7 Muziek…André Rieu…Second Waltz

TOP