voordracht mien

De Smeetsgroep - een limburgse familiesite

In Kessel woor ‘t “Mien van Kessels Sjaek”. In Brach woor ‘t “Mien van Pierre vanne Smeed”. En oos vreugere buren neumdje höar “de juffrouw”. W’r kinne ôs nauweliks veurstèlle det ze d’r neet miër is. Op 20 december höbbe w’r nog gezellig haore verjoardig gevierdj en auch woor ze nog op pap ziene verjoardaag op 1 fibberwarie. Den geit se opins doëd op Valentijnsdaag en is de begrafenis op de verjaordaag van haore kleinzoon Ivo. Waat zeen noe inkele van de sjoënste dinger die w’r ôs es höar kinjer kinne herinnere. Vreuger bienao elke zônjig nao opa en oma in Kessel. In de zomer haaje die auch ein saort boeteverblief op de camping van Jaenke aan de Maas. W’r moogdje natuurlik neet te doon biej de Maas kômme en dan zei mam altied: “ônger de boeie die in de Maas drieve woontj ’t Pötmenke en dae grieptj gaer kleine kiendjes”. Auch ginge w’r natuurlik elk jaor nao Kesselse kirmes en mit de ganse femilie eine drinke biej de Boesjer, Wieke Timmermans aan de Napoleonswaeg of biej Mie vanne zaal. Ich kin mich nog good herinnere det toen in ein van die café’s ein blaad beer bestèldj waerdje en det allemaol kleintjes woore. Mam stuurdje de ober trök, want det môste natuurlik groëte zeen veur ’t zelfdje geldj, mer mit de kirmes tapdje ze dao allein mer kleintjes en toen zeen w’r nao ein anger café gegange wo ze waal groëte tapdje. In de jaore 60 deeje w’r auch dök mit de carnavalsoptocht mit in Kessel. Es eine groëte groep oet Brach tösse allemaol die Kesselse. Mien haaj natuurlik altied de bèste ideeje en w’r sleipdje dao den auch altied de groëtste prieze weg. Mer mit ‘t es zigeunergroep verkleidje jaor woor ’t aafgeloupe. Opins woor de jury of ’t bestuur namelik van meining det boete- Kesselse neet miër mit moogdje doon aan ’t klassement. Det vónje weer natuurlik ônnuëzel en daonao höbbe w’r den auch noëtj miër in Kessel mit de optoch mitgedaon. In de optoch van Brach leep mam es ’t ware altied veurop. Meistal es einzelgenger en auch hiej meistal de iërste pries. Ein van die kiëre es “Lustige Witwe” en in de tied van de film Turks Fruit gans ômhange mit fruit en ein bord “oet Turkije” , dus den witj geer ’t waal. Op eine cruise op de Middellandse Zië mit Juliëtte tiedens ’t gekostumeerdj bal alweer de iërste pries. Mams idee woor namelik ôm kleier en get veur op de kop te make van geweun WC-papier. Inspiratie genôg dus. En toen ze veurig jaor in Berg ging wone, wèrdje ze op de iërste de bèste Carnavalsaktiviteit al oetgerope toet bèst verklèdje, en geïnstalleerdj es prinses van Zorgcentrum Bergh. Pap en man zeen vreuger altied vëul op stap gewaes; veural in Remuunj danse biej Pietje Moërs, nao Einig, Nationaal, Mijnheerkes, nao ’t café van tante Jet Vogels in Neel, de Moulin Rouge van Jantje Selder en middels tössekomst van Ton Jorna nao ’t pliesiebal in Remuunj. Veer es kinjer bleve den altied slaope biej de bure. Die kinjer neumdje haor aojers “vader en moeder” en dus deeje veer det auch; vader en moeder Birk. Qua vakansies zeen pap en mam altied avonturiers gewaes en höbbe ôs altied mitgenômme. Nao de Wörthersee, oppe Wintjersport in Fuschl am See en Mayrhofen. Mer waat ôs ’t meiste is biejgebleve zeen de veural de veur dae tied ziër ôngebroekelikke reisdoele in ’t veurmalige oostblok. Ruslandj, Polen, Tsjecho Slowakije, Joegoslavië. En altied mit de auto natuurlik. Mam woor veural vreuger altied ein gezelligheidsmiens. ‘Somers boete-tennis biej tennisclub Park E9 en de kantine-deenste, en in de wintjer Tenniscenter Wèssem. Ein van haor anger sporte woor kaarte en daobiej soms gaer get foetele, mer det lèste allein es ’t dringendj nuëdig woor. Mit Fientje Schoenmakers en Lenie Deckers, mer auch mit Riet van Meister Moasse en Jacquelien Krekelberg. De twië lètstgeneumdje zeen onlangs auch al nao hiej baove vertrokke, dus kan mam dao verder kaarte en aaf en toe foetele. Mam heel auch waal van ein good möpke en det moogdje waat hoar betrôf bès eine sjuunse zeen, meistal toet ôngenoege van pap. In gezellig zeivere mit miense woor ze auch hiël good. Es Fredje Pöts of Harie Geraats oet Grathem biej hoar inne winkel kwoome, nou, den woor ze waal ein uurke bezig, kwoom d’r kôffie oppe toënbank en stông de winkel blauw van de Caballero sigarettewalm. Jao jao, toen moogdje det nog allemaol. Auch vônj ze ’t altied fijn es Tjeu Rutte van ’t Mèlkhuuske hoar eine poes eige vers geplökdje bloome kwoom bringe. Es kinjer ginge w’r auch hiël dök mit hoar mit de trein nao de lampebeurs in Utrecht. Altied gezellig en nao aaflaup ginge w’r den same örges lekker aete. In Sint Odiliënberg zeen pap en mam es ’t ware gesepareerdj en woorôm? Simpelweg ômdet ze te veul verveurmiddele haaje en in éin appartement daoveur te weinig plaats woor. 2 rollators, 2 rolsteul en eine scootmobiel is weliswaar nog neet zoëveul es vreuger ’t aantal auto’s, motors en bedriefsauto’s, mer dao haaje ze toen den auch ein hiël rits garages veur. Gelökkig haet ze same mit pap nog eine hiële tied in Brach oppe Brouwersstraot moge wone en auch dao woor ze gaer. Kleinkindj Daniël woor in dae tied hiël dök dao en auch vônj ze ’t altied fijn es kleinkinjer Ivo en Laura op bezeuk kwoome. Ivo en Laura wille gaer ein gedicht aan oma opdrage. Kôm mer nao de microfoon. (ik installeer Ivo en Laura bij de microfoon en doe een aantal stappen opzij. Daarna gaan de kinderen weer zitten). W’r höbbe ’n aantal mechanische meziekstökke oetgezôch, mer éin stök wille w’r uch live laote huëre. Ein van mien zwaogers mit artistieke aanlik en mit hiël voal pette op is eine bekindje miens oet Remuunj; Tjeu Moore. Tjeu haet al dökker veur pap en mam gezônge en oppe accordeon gespeeldj op haor verjaordage. Tjeu geitj veur mam noe oppe vleugel spele en zinge. ’t Stök is getiteldj “Omerme” en de tekst höbtj geer biej binnenkomst allemaol ontvange. Neet ôm hel-op mit te zinge, mer zoë det g’r ’t baeter in uch op kintj numme. Mam, loester good; speciaal veur úch; “Omerme”.